الدارميات
الكلب ما بيه صوج تكطع وريده
كل السبب بالعين وكحه وعنيده
******
تذكر تكول العين شمسويه انه
صوج الكلب خواف ذبني بمهانه
******
اعميه والعباس لو هملت العين
ضاع الحساب وياك مو وحده وثنين
****
تهجر تغيب اسنين وتكلي اريدك
شنهي العمر يفلان لعابة بيدك
****
يمشي بفرد شريان دمي ويه دمك
وضلوعي ادفه عليك من حضن امك
****
ليش اليعوف اهواه يصبح شماته
تتشفه بيه الناس حته بمماته
****
كل الدمع شيفيد لو مني راحو
لو دم تهل العين اجفوني استراحو
****
هم عين الك وتنام بعد العملته
لو ذره بيك احساس ليلك مانمته
****
سالم يبعد الروح معموره دارك
شوك ومحبه اهديك عيدك مبارك
****
طول العمر والخير نتمنه الكم
عيد الامان يكون هذه اليمركم
عام السعاده يكون عام اليجيكم
دوم ابفرح وبخير عايد عليكم
***
كلما يطول اجفاك لتصدك انساك
انت السلبت الروح وكليبي وياك
**
ردّ بصدق واخلاص وبسطر واحــد
مني شحصل وشصار واعلّية حاقد
**
اختنك بالعبرات وادموعي شلال
لو ما اشوفك يوم يالوجهك هلال
**
لا كلب رف اعليه لا يحله بالعين
غيرك ينبض الروح وجلاي الاثنين
**
كل رنه كل مسكول حسبالي منه
شنطي القلب اعذار لو سئلني عنك
**
قلبي اعلن الاضراب مايضخ كل دم
لمن يجي المحبوب من عطره يشتم
**
من هسه فضهه وكول مابيه حيلك
لو رايد انته اوياي تلعب بذيلك
**
متعجب انت اهواك ابقلبك مكانه
نبض القلب يفلان سلمته انــه
**
قلبي التولع بيك كل ساعه ينهار
لو غبت يوم اعليه يدخل بالانذار
**
مانفع علك شموع عشره الاصابع
وإشما نصحنه اوياه ... دكنة طابع
**
يرجف يريد يطيح قلبي من الضلوع
لوشافك امن بعيد ايضل دكة مسموع
**
